काठमाडौं । मङ्गलबार राति अमेरिकाको च्याट्सवर्थ स्थित सान फर्नान्डो भ्यालीमा एनबीसी लस एन्जलसको एउटा हेलिकप्टर दुर्घटना भएको छ। दुर्घटनामा परेर तीन जनाको मृत्यु भएको छ।
लस एन्जलसका अग्निनियन्त्रकहरूका अनुसार यो घटना मङ्गलबार बेलुकी भएको हो। एन. म्यासन एभिन्युको ९१०० ब्लकमा रहेका दुई व्यावसायिक भवनहरूको बिचमा हेलिकप्टर खसेको हो। हेलिकप्टर दुईवटा सिपिङ कन्टेनर र पार्क गरिएका केही गाडीहरूमाथि खसेको थियो।
घटना कसरी भयो भन्ने कुरा अझै स्पष्ट भएको छैन। दुर्घटनापछि ठुलो आगलागी भएको दृश्य हवाई भिडियोमा देखिएको छ। सो आगो नजिकै पार्क गरिएका गाडीहरूमा पनि फैलिएको थियो। लस एन्जलसका अग्निनियन्त्रकहरूले आगो निभाउने काम गरेका थिए।
आगो नियन्त्रणमा आएपछि अग्निनियन्त्रक र लस एन्जलस प्रहरीले एउटा शवमाथि पाल टाँगेका थिए। दुर्घटनास्थलमै अन्य दुई जनाको पनि मृत्यु भएको एलएएफडीका अधिकारीहरूले पछि बताएका छन्। अर्का दुई जना घाइतेलाई स्थानीय अस्पताल लगिएको छ। उनीहरूको अवस्था भने तुरुन्तै खुल्न सकेको छैन।
