काठमाडौं । वैदेशिक रोजगारीका सिलसिलामा संयुक्त अरब इमिरेट्स (यूएई) मा रहेका गोरखा पालुङटारका २६ वर्षीय तयब खानले यूएई लटरीको ‘लक्की डे’ ड्रमार्फत ३ करोड दिराम (AED 30 million) लगभग १ अरब २४ करोड नेपाली रुपैया बराबरको बम्पर पुरस्कार जितेका छन्।
अबुधाबीमा सुरक्षा गार्डका रूपमा कार्यरत खान यूएई लटरीको हालको ढाँचाअन्तर्गत ३ करोड दिरामको ग्राण्ड प्राइज जित्ने पहिलो व्यक्ति बनेका हुन्। उनले यो रकम आफ्ना चार जना साथीहरूसँग साझेदारीमा खरिद गरिएको टिकटमार्फत जितेका हुन्, जसअनुसार पुरस्कार रकम पाँच जनाबीच बराबर बाँडिनेछ।
चार वर्षअघि रोजगारीका लागि यूएई पुगेका खानले अनियमित रूपमा छनोट गरेका सातवटा नम्बर विजेता बनेपछि यो सफलता हात पारेका हुन्। लटरीको नतिजा प्रत्यक्ष हेरेका नभए पनि इमेलमार्फत विजेता भएको जानकारी पाएपछि आफू अत्यन्तै खुसी भएको उनले बताएका छन्।
खानले प्राप्त रकमबाट नेपालमा परिवारका लागि नयाँ घर निर्माण गर्ने र भविष्यका लागि लगानी गर्ने योजना बनाएको बताएका छन्।
