काठमाडौं । नेपाल वैदेशिक रोजगार व्यवसायी संघको निर्वाचनका लागि ९०३ प्रतिनिधि दर्ता भएका छन् । संघको प्रतिनिधि व्यवस्थापन समितिका संयोजक तथा द्वितीय उपाध्यक्ष सञ्जु गुरुङका अनुसार लेबी बुझाएका ९०३ प्रतिनिधिको नाम टुंगो लगाइएको जानकारी दिए ।
यो संख्या गत वर्षभन्दा २०० भन्दा बढी रहेकोे पनि उनले जानकारी दिए । सबै म्यानपावर कम्पनी कार्यालयमा सम्पर्क गरी संघमा प्रतिनिधि पठाउनुपर्ने विषयमा कतिपयलाई रहेकोे अन्योल अन्त्य गरेपछि संघमा प्रतिनिधिको संख्या बढेको उनको भनाइ छ । प्रतिनिधिको संख्या वृद्धिसँगै संघलाई आर्थिक रूपमा टेवासमेत मिलेको छ ।
संघको यसअघिको निर्वाचनमा ७०० प्रतिनिधि दर्ता भएका थिए । तीमध्ये ६४६ व्यवसायीले नयाँ नेतृत्वका लागि मतदान गरेका थिए ।जसमध्ये अध्यक्षमा निर्वाचित राजेन्द्र भण्डारीले १९९ मत ल्याएका थिए भने भुवनसिंह गुरुङले १५७, कुमुद खनालले १३१ मत र ईश्वर जीसीले १२८ मत पाएका थिए ।
यस पटक २ प्यानल मात्र रहेका र मतदाता प्रतिनिधि बढेका कारण विजयी हुने उम्मेदवारले मत संख्या बढाउनुपर्ने देखिएको छ ।
