काठमाडौं । बेपत्ता भएको एक महिनासम्म ममता काफ्ले भट्ट फेला परेकी छैनन् । उनी गत साउन १५ बाट बेपत्ता भएकी हुन् ।
नेपाली चेली ममता अमेरिकास्थित आफ्नै घर मनसास पार्कबाट बेपत्ता भएपछि उनका श्रीमान् नरेश भट्टलाई प्रहरीले नियन्त्रणमा लिएको थियो ।
आमा ममता बेपत्ता र बाबु नरेश थुनामा परेपछि उनीहरूकी एक वर्षीया नाबालिका छोरीले आमा खोज्ने, रुने, कराउने र टोलाउन थालेपछि ममताकी आमा गीता र उनका दाजु भर्जिनिया पुगेका छन् ।
अमेरिकी प्रहरीले ममतालाई हत्या गरी मृत शरीर लुकाएको आरोपमा नरेशलाई थुनामा राखेर अनुसन्धान गरिरहेको छ ।घरमा भारी मात्रामा रगत बगेकोसहितका तथ्यहरु फेला परेपछि मनसास पार्कबाट प्रहरीले भदौ ७ मा नरेशलाई पक्राउ गरेको थियो ।
यसलगत्तै काफ्लेको माइती पक्षले नेपालस्थित अमेरिकी दूतावासका अधिकारीहरुसँग समेत भेट गरेका थिए । त्यसपछि उनीहरूले अमेरिका जाने प्रक्रिया थालेका थिए । भिसा लगायतका प्रक्रिया पूरा भएपछि उनीहरू अमेरिका पुगेको सहकुलप्रसाद तिम्सिनाले बताए ।
