काठमाडौं । जेठ महिनामा करिब ७५ हजार युवायुवती वैदेशिक रोजगारीमा गएका छन् । वैदेशिक रोजगार विभागको तथ्यांकअनुसार जेठमा श्रम स्वीकृति लिएर वैदेशिक रोजगारमा जाने युवायुवतीको संख्या ७४ हजार ४६७ रहेको छ । त्यसमा ८ हजार १६५ जना महिला छन् ।
जेठमा म्यानपावर कम्पनीमार्फत ३३ हजार ६३८ जना वैदेशिक रोजगारीमा गएका छन् भने ११ हजार ९०५ जना व्यक्तिगत श्रम स्वीकृतिमा गएका छन् । जिटुजीमार्फत पठाइने इजरायल र दक्षिण कोरियामा एक हजार १७१ जना गएका छन् ।
जेठमा सबैभन्दा बढी २४ हजार ७०४ जना यूएई गएका छन् । त्यसमा म्यानपावर कम्पनीमार्फत १६ हजार ५४७ जना गएका छन् ।
साउदी अरेबियामा ११ हजार ९६१ जना गएका छन् । म्यानपावर कम्पनीमार्फत उक्त मुलुकमा ६ हजार ६२० जना गएका छन् । कतारमा ११ हजार ९१ जना गएकोमा म्यानपावर कम्पनीमार्फत कतार २ हजार ६८१ जना गएका छन् ।
मलेसियामा ७ हजार २३० जना गएकोमा म्यानपावर कम्पनीमार्फत २ हजार ६८२ जना र कुवेतमा ४ हजार ६३० जना गएकोमा म्यानपावर कम्पनीमार्फत २ हजार ७५१ जना गएका छन् । म्यानपावर कम्पनीमार्फत हङकङमा २ जना, मकाउमा २ जना, चीनमा ९ जना, माल्दिभ्समा २० जना, जोर्डनमा १२५ जना, जापानमा २०७ जना, मौरिससमा ३४९ जना, बहराइनमा ४११ जना, ओमानमा ४२१ जना र साइप्रसमा ८१३ जना गएका छन् ।
चालु आर्थिक वर्षको ११ महिनामा श्रम स्वीकृति लिएर वैदेशिक रोजगारीमा जाने नेपालीको संख्या ७ लाख ६० हजार ३९१ पुगेको छ । गत वर्ष ७ लाख ४१ हजार ९२७ जना वैदेशिक रोजगारीमा गएका थिए ।
