काठमाडौँ । चीनको दक्षिण-पश्चिममा रहेको सिजाङ स्वायत्त क्षेत्रको गिरोङ काउन्टीमा लेदोपहिरो विपद्का क्रममा बनेको ताल पूर्ण रूपमा सुकेको छ। स्थानीय अधिकारीहरूका अनुसार तालको पानी पूर्ण रूपमा निष्कासन भई स्थिति नियन्त्रणमा आएको हो।
गत भदौ १० गतेको विपद्का लागि गठित आपत्कालीन उद्धार मुख्यालयका अनुसार यसअघि गरिएको राडार सर्भेले उक्त ताल करिब ०.१ वर्ग किलोमिटर क्षेत्रमा फैलिएको देखाएको थियो। तालमा करिब २२ लाख घनमिटर पानी सञ्चित रहेको अनुमान गरिएको थियो। पहिरोले बनेको बाँधको औसत उचाइ ६० मिटर र लम्बाइ करिब १,१०० मिटर रहेको अनुमान गरिएको थियो।
उद्धार तथा अनुगमन टोलीले लुकआउट पोस्ट, भिडियो निगरानी प्रणाली र भिरालो जमिन अनुगमन गर्ने राडारमार्फत २४ सै घण्टा निरीक्षण गरिरहेका थिए। टोलीले पानीको बहाव र बाँधको संरचनामा आएको परिवर्तनलाई निरन्तर पछ्याइरहेका थिए।
पछिल्लो विज्ञ मूल्याङ्कनका आधारमा अधिकारीहरूले ताल पूर्ण रूपमा खाली भइसकेको र यससँग सम्बन्धित जोखिमहरू नियन्त्रणमा रहेको पुष्टि गरेका छन्।
