काठमाडौँ । रसुवाको भोटेकोशी नदीमा आएको विनाशकारी बाढीपछि त्रिशूली नदी किनारमा फेला परेका शवहरूमध्ये हालसम्म ६ जनाको मात्रै पहिचान खुलेको छ । जिल्ला प्रशासन कार्यालय धादिङले सार्वजनिक गरेको पछिल्लो तथ्याङ्क अनुसार बाढीले बगाएर ल्याएका कुल ५९ वटा शव फेला परेकोमा ६ जनाको मात्रै सनाखत हुन सकेको हो।
प्रशासनका अनुसार सनाखत हुनेहरूमा भक्तपुर नगरपालिका-९ का सत्य सुन्दर प्रजापति, रसुवा उत्तरगया गाउँपालिका-५ की फुलमाया ढकाल र काठमाडौं महानगरपालिका-१६ घर भई हाल गजुरी-६ मा बस्दै आएकी सुन्दरी श्रेष्ठ रहेका छन् । त्यसैगरी, गोरखा पालुङटार-५ की ५४ वर्षीया तारा राना भाट तथा नुवाकोट विदुर नगरपालिका-१० का ३२ वर्षीया सोनिया डंगोल र ३३ वर्षीया अष्ट लक्ष्मी डंगोलको पनि पहिचान खुलेको छ।
पहिचान खुलेका यी ६ वटै शवहरू परिवारले बुझिसकेका छन्।
फेला परेका अन्य शव र मानव अङ्गहरूको अवस्था क्षतविक्षत रहेकाले पहिचानमा समस्या देखिएको छ । बाढीले बगाएर ल्याएका शवहरू पोखरास्थित गण्डकी स्वास्थ्य विज्ञान प्रतिष्ठान, काठमाडौंको टिचिङ अस्पताल र धादिङको गजुरी प्राथमिक स्वास्थ्य केन्द्रमा राखिएको थियो। शरीरका टुक्राहरू धेरै भएको र शवहरू चिन्न नसकिने अवस्थामा रहेकाले प्रशासनले कानुनी र वैज्ञानिक प्रक्रिया अपनाएर पहिचानको प्रयास गरेको थियो।
पहिचान हुन नसकेका बाँकी २३ वटा शव र शवका टुक्राहरूलाई डिएनएनमुना संकलन गरी व्यवस्थापन गरिएको छ। जिल्ला प्रशासन कार्यालय धादिङका प्रतिनिधि, सुरक्षा निकायका प्रमुखहरू र धुलिखेल अस्पतालका फरेन्सिक विज्ञ डा. राजकुमार कार्कीको रोहबरमा गजुरी गाउँपालिका-५ स्थित भोटे चिहान ठूलो सामुदायिक वन क्षेत्रमा ती शवहरूको व्यवस्थापन गरिएको हो।
अझै पनि धादिङका विभिन्न पालिकाका १४७ जना व्यक्तिहरू सम्पर्कविहीन रहेका छन्।
