काठमाडौं । काठमाडौंको नयाँ बानेश्वरमा ड्युटीमा रहेकी महिला प्रहरी जवानमाथि हातपात गरेको आरोपमा एक युवक पक्राउ परेका छन्।
मंगलबार बिहान बानेश्वर क्षेत्रमा ट्राफिक व्यवस्थापन तथा सडक सुरक्षाका लागि खटिएकी महिला प्रहरी जवानले जथाभावी सडक पार गर्न खोजिरहेका एक युवकलाई रोकेकी थिइन्। उनले पैदल यात्रुका लागि बनाइएको आकाशे पुल प्रयोग गरेर बाटो काट्न आग्रह गरेकी थिइन्।
प्रहरीका अनुसार प्रहरी जवानले सुरक्षित रूपमा सडक पार गर्न आग्रह गरेपछि ती युवकले उनीमाथि हातपात गरेका थिए। घटनालगत्तै प्रहरीले युवकलाई नियन्त्रणमा लिएको हो।
पक्राउ पर्नेमा जुम्लाको तातोपानी गाउँपालिका–२ घर भई हाल काठमाडौं महानगरपालिका–१० बानेश्वरमा बस्दै आएका २७ वर्षीय राज कठायत रहेका छन्।
सडक पार गर्ने क्रममा पैदल यात्रुको सुरक्षाका लागि आकाशे पुल प्रयोग गर्न आग्रह गरेकै विषयमा ड्युटीमा रहेकी प्रहरीमाथि हातपात भएपछि प्रहरीले तत्कालै उनलाई नियन्त्रणमा लिएको हो।घटनाबारे प्रहरीले थप अनुसन्धान अघि बढाएको जनाएको छ।
