काठमाडौं ।  जापानको फुकुओका सहरस्थित नाकागावा नदीमा २५ वर्षीया नेपाली युवती लक्ष्मी राजवंशी मृत अवस्थामा फेला परेकी छन्। अगस्ट १९ तारिख, अर्थात् भदौ ३ गते, उनी नदीमा शव अवस्थामा भेटिएकी हुन्।

झापा जिल्लाको भद्रपुर नगरपालिका–७, अन्जनी मोड घर भएकी राजवंशी जापानमा अध्ययनरत थिइन्। उनी फुकुओका सहरको चुओ वार्डमा रहेको एक व्यावसायिक विद्यालयकी विद्यार्थी रहेको बताइएको छ।

शरीरमा चोटका निशान, हत्या आशंकामा अनुसन्धान

जापानी सञ्चारमाध्यमका अनुसार राजवंशी नदीमा घोप्टो परेको अवस्थामा फेला परेकी थिइन्। उनको अनुहार र टाउकोमा चोटका निशान देखिएको जनाइएको छ।

शव फेला पर्दा उनले टी–सर्ट र छोटो पाइन्ट लगाएकी थिइन् भने खुट्टामा जुत्ता थिएन। घटनाको प्रकृति शंकास्पद देखिएपछि फुकुओका प्रहरीले दुर्घटनाको सम्भावनाभन्दा आपराधिक घटनाको कोणबाट अनुसन्धान अघि बढाएको बताइएको छ।

घटनामा पाँचजना नियन्त्रणमा

घटनासँग सम्बन्धित अनुसन्धानका क्रममा जापान प्रहरीले पाँचजनालाई नियन्त्रणमा लिएर सोधपुछ गरिरहेको जानकारी प्राप्त भएको छ। उनीहरूको भूमिका र घटनाको विस्तृत विवरणबारे थप अनुसन्धान भइरहेको बताइएको छ।

शव नेपाल ल्याउन पहल

झापा क्षेत्र नम्बर ३ बाट निर्वाचित प्रतिनिधिसभा सदस्य प्रकाश पाठकले घटनाको जानकारी पाएलगत्तै परराष्ट्र मन्त्रालय तथा जापानस्थित नेपाली निकायहरूसँग समन्वय भइरहेको बताएका छन्।

उनका अनुसार घटनाको छानबिन, दोषीमाथि कारबाही तथा मृतकको शव नेपाल ल्याउने प्रक्रियाका लागि नेपाल सरकार, परराष्ट्र मन्त्रालय र जापानस्थित नेपाली दूतावाससँग आवश्यक सहजीकरण भइरहेको छ।

लक्ष्मी राजवंशी अध्ययनका लागि जापान पुगेकी थिइन्। उनको असामयिक र शंकास्पद मृत्युको खबरले झापास्थित परिवार, आफन्त तथा नेपाली समुदायमा शोक छाएको छ।