काठमाडौं । अनलाइन बेटिङ (सट्टेबाजी)मा संलग्न आरोपमा प्रहरीले १७ जनालाई पक्राउ गरेको छ । सोमबार (जेठ १९) राति उपत्यका अपराध अनुसन्धान कार्यालयको टोलीले पाँच भारतीय नागरिकसहित १७ जनालाई पक्राउ गरेको हो ।
उनीहरूले ललितपुरको नख्खुस्थित सनराइज अपार्टमेन्टको फ्ल्याट र धापाखेलमा एउटा घर नै भाडामा लिएर सट्टेबाजी खेलाउने गरेका प्रहरीले जनाएको छ । उनीहरूले विगत पाँच महिनादेखि घर र फ्ल्याट भाडामा लिएर सट्टेबाजी खेलाउने गरेको देखिएको कार्यालयका एसपी काजीकुमार आचार्यले जानकारी दिए ।
सट्टेबाजी सञ्चालक भारतीय नागरिक रहेको खुलेको छ । पक्राउ परेका नेपाली विभिन्न मितिमा भिजिट भिसामा दुबई पुगेका र त्यहाँ कामको खोजीमा अलपत्र परेपछि अनलाइन बेटिङ गराउने समूहमा संलग्न भएका प्रहरीले जनाएको छ ।
नेपालीलाई मासिक तलब दिएर अनलाइन बेटिङको धन्दामा लगाइएको खुलेको छ । अछामका डायमण्ड कुँवरसहित १२ नेपाली पक्राउ परेका छन् ।
उनीहरूले बेटिङमार्फत सबै रकम भारतीय बैंक खातामा ट्रान्सफर गर्ने गरेको खुलेको छ । उनीहरूले ८० करोड रुपैयाँबराबरको कारोबार गरेको प्रहरी अनुसन्धानका क्रममा देखिएको छ । सट्टेबाजीका निम्ति उनीहरूले सेभेन बेट, ३६५ बेट साइट प्रयोग गर्ने गरेका थिए ।
भिजिट भिसामा को, कहिले गएका थिए दुबई ?
दुबई पुगेका नेपालीलाई सम्पर्क गरी अवैध अनलाइन ठगी धन्दामा लगाएको लामो समयपछि १२ नेपाली र ५ भारतीय सोमबार राति ललितपुरबाट पक्राउ परेका छन् ।
पक्राउ पर्नेहरूमा अछामको साँफेबगर नगरपालिका-९ का २९ वर्षीय डायमन्ड कुँवर, अछामकै चौरपाटी गाउँपालिका-७ का २१ वर्षीय मनोज बोगटी, कञ्चनपुरको कृष्णनगर नगरपालिका-३ का ३० वर्षीय राजेन्द्रबहादुर महत, कैलालीको गौरीगंगा नगरपालिका-६ का २१ वर्षीय अरविनकुमार खड्का, दाङको लमही नगरपालिका-१ का २४ वर्षीय विष्णुकुमार राउत, डोटीको पूर्वीचौकी गाउँपालिका-४ का ३० वर्षीय तिलक खड्का, पूर्वी नवलपरासीको गैंडाकोट नगरपालिका-१२ का २६ वर्षीय जोर्डन भनिने जीतबहादुर महतो, डोटीको पूर्वीचौकी गाउँपालिका-४ का २३ वर्षीय सुवास खड्का, अछामको साँफेबगर नगरपालिका-७ का २१ वर्षीय विकास थापा, डोटीको पूर्वीचौकी गाउँपालिका-४ का २३ वर्षीय हर्कबहादुर खड्का र रुपन्देहीको तिलोत्तमा नगरपालिका-४ का २६ वर्षीय पूर्णबहादुर दलार्मी मगर छन् ।
त्यसैगरी, भारत बिहारका २० वर्षीय ऋषभ राज, बिहारकै २६ वर्षीय दीपककुमार सिंह, बिहारकै २५ वर्षीय अंकित कुमार सिंह, बिहारकै २५ वर्षीय धीरजकुमार सिंह, दिल्लीका २५ वर्षीय मोहितकुमार सिंह छन् ।
उनीहरूबाट बेटिङ खेलाउन प्रयोग भएको १४ वटा ल्यापटप र ६० वटा मोबाइल बरामद गरिएको अपराध अनुसन्धान कार्यालयका एसपी तथा प्रवक्ता काजीकुमार आचार्यले बताए ।
भिजिट भिसामा दुबई पुगेर भारतीय अनलाइन बेटिङ गिरोहको सम्पर्कमा पुगेका नेपाली युवालाई मासिक ८० हजार रुपैयाँसम्म तलब दिएर अवैध धन्दामा काम लगाउने गरेको पाइएको छ ।
पक्राउ परेकामध्ये कुँवर सन् २०२२ मा भिजिट भिसामा गएका थिए । सामाखुसीमा रहेको एक म्यानपावरले डेढ लाख रुपैयाँ लिएर भिजिट भिसामा आफूलाई दुबई लगेको कुँवरले बताएको एक अनुसन्धान अधिकृतले बताए ।
डेढ लाख दिएपछि भिजिट भिसाका लागि चाहिने बैंक ब्यालेन्सदेखि होटल बुकिङ र फर्कनेसम्मको टिकट नक्कली बनाएको अनुसन्धानबाट खुलेको छ । यस विषयमा प्रहरीले विस्तृत अनुसन्धान गर्न बाँकी नै छ ।
भिजिट भिसामा जानका लागि सबै सेटिङ मिलाउनुपर्छ भन्दै एकजनाबाट साढे २ लाख रुपैयाँसम्म लिएको पक्राउ परेकाहरूले बताएको एक अनुसन्धान अधिकृतले बताउँछन् ।
अछामकै बोगटी पनि २५ नोभेम्बर २०२४ मा भिजिट भिसामा दुबई पुगेको खुलेको छ । त्यहाँ पुगेपछि उनी पनि भारतीय गिरोहको सम्पर्कमा पुगेका थिए ।
महत पनि सन् २०२३ मा भिजिट भिसामा दुबई गएका व्यक्ति हुन् । अरविन खड्का भने दुबई नगएका व्यक्ति हुन् । राउत २०२४ र २०२५ मा भिजिट भिसामा दुबई पुगेका थिए ।
डोटीका ठक्कर कुँवर २०२४ मा, डोटीकै देवी कुँवर २०२४-२०२५ मा दुबई गएको पाइएको छ । डोटीका तिलक खड्का पनि २०१९ र २०२५ मा भिजिट भिसामा दुबई पुगेका थिए ।
गैंडाकोटका महतो २६ जनवरी २०२५ मा भिजिट भिसामा दुबई पुगेको पाइएको छ । डोटीका हर्कबहादुर खड्का पनि २६ जनवरी २०२५ मा भिजिट भिसामा दुबई गएको देखिएको छ । रुपन्देहीका दर्लामी मगर २०२४-२०२५ मा भिजिट भिसामा दुबई गएको देखिएको छ ।
यो समूहले लामो समय दुबईमा काम गरेर ५ महिनाअघि मात्रै सरुवा भएर आएको पाइएको छ । केही समय यहाँ काम गरेपछि श्रीलंका पठाउने तयारीमा रहेको प्रहरीले बताएको छ ।
