काठमाडौं । नेपाली कांग्रेसका सभापति शेरबहादुर देउवाले पूर्वराजा ज्ञानेन्द्र शाहका नाममा गरिएको अराजकता निन्दनीय भएको बताएका छन् ।
नेपाली लेखक संघको अधिवेशन उद्घाटनका लागि लुम्बिनी पुगेका सभापति देउवाले राजनीतिक आन्दोलनमा निजी र सार्वजनिक सम्पत्तिमा तोडफोड तथा आगजनी गर्ने काम स्वीकार्य नहुने बताए ।
उनले पूर्वराजा ज्ञानेन्द्र संवैधानिक दायरामा नबसेको भन्दै उनका समर्थकहरू पनि नैतिक र कानुनी सीमाभित्र नबसेको बताए ।
“तीनकुनेमा अराजकता देखाउनेहरूलाई राजनीतिक मान्न सकिँदैन । त्यस्ता अराजक गतिविधि आपराधिक क्रियाकलाप हुन्,” देउवाले भने, “पूर्वराजा ज्ञानेन्द्र शाह हिजो संवैधानिक दायरामा बसेनन्, बस्न चाहेनन् र राजतन्त्र गएको हो । अब यस्ता अराजकताबाट राजतन्त्र फर्किँदैन । बरु थप औचित्यहीन हुन्छ ।”
देउवाले नागरिकमा असन्तुष्टि भए यही संविधान र व्यवस्थाभित्रबाट खोज्न सकिने तर योभन्दा खराब व्यवस्थाका पक्षमा नागरिक लाग्न नसक्ने बताए ।
