काठमाडौँ । बेरोजगार युवायुवतीहरूलाई आकर्षक तलबको प्रलोभनमा पारेर रोजगारीका लागि यूके पठाइदिन्छु भन्दै लाखौँ रुपैयाँ ठगी गरेको आरोपमा एकजना युवक पक्राउ परेका छन् । पक्राउ पर्नेमा दोलखा घर भई हाल काठमाडौँको कागेश्वरी मनोहरा नगरपालिका–८ बस्ने २४ वर्षीय रामकृष्ण दाहाल रहेका छन् ।
उनले एक जनासँग ३१ लाख ५० हजार रुपैयाँ पैसा लिएर सम्पर्कविहीन भएका थिए । पीडितले दिएको जाहेरीको आधारमा काठमाडौँ उपत्यका अपराध अनुसन्धान कार्यालयको टोलीले दाहाललाई बुधबार पक्राउ गर्न सफल भएको थियो ।
उनलाई थप अनुसन्धान तथा कारबाहीका लागि जिल्ला प्रहरी परिसर भद्रकाली पठाइएको प्रहरी उपरीक्षक अंगुर जिसीले जानकारी दिए ।
