काठमाडौँ । काठमाडौँको त्रिपुरेश्वरमा सोमबार दिउँसो आफैँले चलाएको बसभित्र आगो लगाएर आत्मदाहको प्रयास गर्नुअघि चालक २५ वर्षीय दावा लामाले ट्राफिक प्रहरीसँग विवाद गरेको तथ्य बाहिरिएको छ। सडकमा ड्युटीमा रहेका ट्राफिक प्रहरीले आफूमाथि बिनागल्ती दुर्व्यवहार गरेको र हातपात गरेको भन्दै आक्रोशित बनेका लामाले त्यसको केही समयपछि नै यात्रुविहीन बसभित्र आफैँलाई थुनेर आगो लगाएका हुन्।
सामानिजक सञ्जालमा सार्वजनिक एक भिडियोमा चालक दावा लामा ट्राफिक प्रहरीमाथि निकै आक्रोशित मुद्रामा प्रस्तुत भएको देखिन्छ। भिडियोमा उनले आक्रोश पोख्दै भनेका छन्, ‘मलाई बिना गल्ती किन हान्नुपर्यो ? मेरो गल्ती बिना उहाँले किन यस्तो गर्नुभयो ? मैले यति धेरै सहयोग गर्दागर्दै मलाई चाबी झिकेर हान्नुभयो।’
उक्त भिडियोमा चालक लामाले आफू झापाको भएको बताउँदै ट्राफिक प्रहरीको व्यवहारप्रति असन्तुष्टि जनाएका छन्। उनले भनेका छन्, ‘हामी झापाको मान्छे हो सर,.... यहाँ म छोड्दिनँ....जे गर्न सक्छस् गर् रे पुलिस प्रशासनले।’ त्यतिबेला वरिपरि रहेका सर्वसाधारण तथा अन्य व्यक्तिहरूले उनलाई सम्झाउँदै गाडी साइड लगाउन आग्रह गरे पनि उनी अत्यन्तै उत्तेजित अवस्थामा देखिएका थिए।
त्यस विवादको केही समयलगत्तै लामाले त्रिपुरेश्वर सडक खण्डमा बा ५ ख ४२७४ नम्बरको सार्वजनिक बसभित्र आफूलाई बन्द गरी आगो लगाएका थिए । बसमा कुनै पनि यात्रु नभएका बेला चालकले आगो लगाएपछि गाडी ह्वारह्वार्ती बलेको थियो। तत्कालै पुगेको दमकल, प्रहरी र स्थानीयको सहयोगमा आगो नियन्त्रणमा लिइएको थियो भने गाडीभित्र जलेर गम्भीर घाइते भएका लामाको उद्धार गरिएको थियो।
उद्धारपछि उनलाई तत्काल उपचारका लागि कीर्तिपुरस्थित बर्न अस्पताल पुर्याइएको थियो। कीर्तिपुर बर्न अस्पतालका प्लास्टिक सर्जरी विभाग प्रमुख एवं सिनियर कन्सल्टेन्ट प्लास्टिक सर्जन डा.विशाल कार्कीका अनुसार चालक लामाको शरीरको ९० प्रतिशत भाग जलेको छ र उनको अवस्था अत्यन्तै गम्भीर तथा चिन्ताजनक रहेको छ।
काठमाडौँ जिल्ला प्रहरी परिसरका प्रमुख, एसएसपी दिलीप घिमिरेले घटनाबारे विस्तृत अनुसन्धान भइरहेको बताए।
