काठमाडौं । नेपालबाट केयरगिभरका लागि इजरायल जान भाषा परीक्षा नहुने भएको छ । इजरायल आफ्नो देश लैजान लक्की ड्रमार्फत कामदारको छनोट गर्ने वैदेशिक रोजगार विभागले जनाएको छ ।
विभागको इजरायल–जापान शाखाका निर्देशक गिरिराज ज्ञवालीले इजरायलले छोटो प्रक्रियाबाट कामदारको छनोट गर्न खोजेको बताएका छन् । उनका अनुसार जति सकिन्छ चाँडो कामदार लैजान खोजेको भन्दै इजरायलकै आग्रहमा उक्त छनोट प्रक्रिया अघि बढिरहेको हो ।
पहिला भाषा परीक्षा लिइन्थ्यो । तर, अहिले ब्रिटिस काउन्सिलबाट लिएको भाषा परीक्षालाई नै मान्यता दिएको छ भने अब थप भाषा परीक्षा नहुने ज्ञवालीले बताए ।
विभागले आवश्यक कागजात परीक्षण गरेर तीन हजार ४६१ जनाको सूची इजरायलस्थित पीबालाई पठाएको थियो । उक्त सूचीमा रहेका नाममा पीबाले नेमचेक गर्ने र त्यसपछि सूची विभागलाई पठाउनेछ ।
विभागले त्यसका लागि साउन २१ गते नै उक्त सूचीका लागि विवरण पठाएको थियो । पीबाले नेमचेक पछिको सूची विभागलाई पठाउने र विभागले पछि लक्की ड्रका लागि पठाउनेछ ।
लक्की ड्र मार्फत पीबाले एक हजार जना मुख्य उम्मेदवार र एक हजार जना वैकल्पिक उम्मेदवार छनोट गर्नेछ । पीबाले लक्की ड्र मार्फत पठाएकाहरूको सूचीलाई नै विभागले अन्तिम मानेर स्वास्थ्य परीक्षणका लागि पठाउनेछ ।
त्यही सूचीलाई इजरायलीस्थित रोजगारदाता समक्ष पेस गरिनेछ । रोजगारदाताले कामदार छनोट गरेपछि उनीहरूले नै भिसा शुल्क तिरिदिनेछन् ।
त्यसपछि दूतावासमा गएर भिसा लगाउने र इजरायल जानका लागि उडान तालिका तय गर्ने कार्यतालिका रहेको छ । यो सबै प्रक्रिया पूरा गरेर सेप्टेम्बरको अन्तिमसम्ममा नेपालबाट कामदार इजरायल लैजाने इजरायलको चाहना रहेको ज्ञवालीको भनाइ छ ।
