काठमाडौँ । वैदेशिक रोजगार विभागले वैदेशिक रोजगारीमा पठाएका श्रमिकहरूको विवरण पेस गर्न निर्देशन दिएको छ । १ चैत २०८२ देखि ३१ जेठ २०८३ सम्म कति श्रमिक पठाएको, कुन विमानस्थल प्रयोग गरेर उडाएको लगायत विवरण ३ दिनभित्र पेस गर्न साेमबार निर्देशन दिएको हो ।
विभागले इजाजतपत्र प्राप्त सबै वैदेशिक रोजगार व्यवसायी संस्थाहरूलाई विगत तीन महिनामा स्वदेशी विमानस्थल प्रयोग गरी वैदेशिक रोजगारीमा पठाइएका कामदारहरूको विवरण उपलब्ध गराउन निर्देशन दिएको छ ।
वैदेशिक रोजगार ऐन, २०६४ को दफा २२ मा वैदेशिक रोजगारीमा कामदार पठाउँदा अनिवार्य रूपमा स्वदेशी विमानस्थल प्रयोग गर्नुपर्ने व्यवस्था छ । सोही व्यवस्थाको कार्यान्वयनको अवस्था बुझ्न विभागले यो विवरण माग गरेको जनाएको छ ।
विभागका अनुसार म्यानपावर कम्पनीहरूले कामदारको नाम, राहदानी नम्बर, श्रम स्वीकृति प्राप्त मिति, गन्तव्य मुलुक, उडान भएको मिति र प्रयोग गरिएको विमानस्थल खुल्ने गरी तोकिएको ढाँचामा विवरण तयार पार्नुपर्नेछ ।
