काठमाडौँ । काठमाडौं महानगरपालिकाले चालु आर्थिक वर्ष २०८२/०८३ को १० महिनामा ४१ प्रतिशत खर्च गरेको छ । महानगरपालिका अनुसार वैशाखको तेस्रो सातासम्म करिब ४१ प्रतिशत खर्च गरेको छ ।
महानगरको वित्त विभागका अनुसार महानगरपालिकाको हालसम्मको कुल खर्च ४०.९४ प्रतिशत र वडाहरूको औसत खर्च ३९.३ प्रतिशत छ । महानगरले चालु आर्थिक वर्षका लागि २५ अर्ब ७६ करोड ४३ लाख ४१ हजार रुपैयाँको बजेट ल्याएको थियो ।
विभागका अनुसार सबैभन्दा बढी खर्च गर्ने वडाले ५७.१७ प्रतिशत र सबैभन्दा कम गर्नेले १३.२१ प्रतिशत प्रगति हासिल गरेका छन् ।
महानगरले वडाहरूलाई ठुला, मझौला र साना गरी तीन प्रकृतिमा विभाजन गरेर बजेट विनियोजन गर्ने गरेको छ ।
ठुला वडा १५ वटा रहेको छ । जसलाई १० करोड रुपैयाँ थप पूर्वाधारका लागि ७ करोड रुपैयाँ विनियोजन हुन्छ । यस्तै मझौला वडा ११ वटा रहेका छन । जसलाई वार्षिक ७ करोड ५० लाख रुपैयाँ र थप पूर्वाधारका लागि ५ करोड विनियोजन भएको छ ।
यस्तै ६ वटा साना वडाहरुलाई वार्षिक वडागत ५ करोड रुपैयाँ र थप पूर्वाधारका लागि ३ करोड रुपैयाँ विनियोजन भएको छ ।
यसबाहेक सामाजिक कार्य, खेलकुद, सरसफाइ र जात्रा पर्व सञ्चालनका लागि पनि वडाहरूलाई छुट्टाछुट्टै बजेट पठाउने गरिएको छ ।
विनियोजित पूर्वाधार विकास बजेटको न्यूनतम ५० प्रतिशत अनिवार्य रूपमा पूर्वाधारमै खर्च गर्नुपर्ने व्यवस्था छ ।
