बुटवल – प्युठानमा ‘डेटिङ’मा बसेक एक जोडीलाई बँदेल भन्दै गोली हान्दा युवकको मृत्यु भएको छ ।
प्युठानको गौमुखी गाउँपालिका–४ स्थित सामुदायिक वन क्षेत्रमा प्रेमीप्रेमिका डेटिङ बसिरहेको अवस्थामा सिकार गर्न गएका व्यक्तिले गोली प्रहार गर्दा युवकको मृत्यु भएको हो । युवती घाइते भएकी छन् ।
चैत २९ गते साँझ, जंगली जनावरको खोजीमा जंगल पसेका चार युवाको समूहले ‘बँदेल देखियो’ भनेर गोली चलाउँदा बसिरहेका युवायुवतीलाई लागेको हो ।
गोली लागेर नौबहिनी गाउँपालिका–४ का १९ वर्षीय सुशील परियार ढलेका थिए । उनीसँगै रहेकी १८ वर्षीया किशोरी पनि घाइते भइन् ।
घटनापछि तत्कालै अस्पताल पुर्याइए पनि सुशीललाई बचाउँन नसकिएको प्रहरीले जनाएको छ ।
चैत ३० गते उनले उपचारकै क्रममा मृत्यु भएको हो । घाइते किशोरी भने उपचारपछि खतरामुक्त रहेको जिल्ला प्रहरी कार्यालय प्युठानका डीएसपी नरहरी अर्यालले जानकारी दिए ।
प्रहरीका अनुसार २७ वर्षीय वीरेन्द्र केसीसहित चारजना शिकार खेल्न गएका थिए । टाढाबाट जनावर ठानेर गोली चलाउँदा यस्तो दुर्घटना भएको प्रारम्भिक अनुसन्धानले देखाएको छ ।
घटनापछि संलग्न सबैलाई पक्राउ गरिएको छ । उनीहरूबाट दुई थान भरुवा बन्दुक समेत बरामद गरिएको छ । अहिले उनीहरूमाथि ज्यान र हातहतियारसम्बन्धी मुद्दा चलाउने तयारी भइरहेको डीएसपी अर्यालले जानकारी दिए ।
