काठमाडौँ । श्रम, रोजगार तथा सामाजिक सुरक्षा मन्त्रालयले राेजगारीका लागि मलेसियामा नेपाली श्रमिक पठाउने विषयमा केही म्यानपावर व्यवसायीलाई फाइदा पुग्ने गरी सिन्डिकेट गर्न लागिएको भन्ने समाचारहरूप्रति गम्भीर ध्यानाकर्षण भएको जनाएको छ ।
मन्त्रालयले बिहीबार एक प्रेस विज्ञप्ति जारी गर्दै वैदेशिक रोजगारलाई सुरक्षित, मर्यादित र नियमित बनाउन सरकार प्रतिबद्ध रहेको जनाएको छ । यस्तै मन्त्रालयले मलेसिया रोजगारीबारे उपयुक्त निर्णय लिने समेत बताएकाे छ ।
मन्त्रालयका अनुसार मलेसियामा नेपाली श्रमिक पठाउने विषयमा सन् २०१८ नोभेम्बर २९ मा नेपाल र मलेसिया सरकारबिच भएको श्रम समझदारी अहिले नवीकरणको चरणमा रहेको छ ।
मन्त्रालयले यस सम्बन्धमा गत कात्तिक १३ गते मलेसियाको परराष्ट्र मन्त्रालयबाट प्राप्त पत्र अनुसार नेपाल सरकारले सम्बन्धित सबै निकायसँग छलफल गर्दै अघि बढिरहेको जानकारी दिएको छ ।
