काठमाडौँ । रामेछाप नगरपालिका–९ कि कल्पना विश्वकर्माले वैदेशिक रोजगारीको क्रममा दुवई गएका आफ्ना श्रीमान शम्भु विश्वकर्मालाई नेपाल झिकाउन सहयोग गरिदिन अपील गरेकी छन् । बिहीबार रिपोर्टर्स क्लब नेपालमा पत्रकार सम्मेलन गर्दै उनले आफ्ना श्रीमानलाई बैंकिङ कसुरमा फसाइएको र विगत ११ महिनादेखि अलपत्र अवस्थामा दुवइको सडक पेटीमा बस्दै आएको बताइन् ।
कल्पनाका अनु्सार उनका श्रीमान शम्भु काठमाडौँको टोखा–५ बुढानीलकण्ठमा रहेको मोभिरा ओभरसिज प्रा.लि. बाट वैदेशिक रोजगारीका लागि दुवई गएका थिए । कम्पनीले करार सम्झौताबमोजिम तलब, सेवा, सुविधा उपलब्ध नगराएपछि आफ्ना श्रीमान शम्भुले सो कम्पनी छाडेर भागेको कल्पनाले बताईन् ।
त्यसपछि एक पाकिस्तानी नागरिकले काम लगाइदिएको उनले बताईन् । उक्त पाकिस्तानी नागरिकले शम्भुको आईडी कार्ड र हस्ताक्षर दुरुपयोग गरी एक वित्तीय संस्थाबाट ऋण लिएपछि उनलाई नेपाल आउन नदिइएको कल्पनाको भनाइ छ । कल्पनाका अनुसार पाकिस्तानी नागरिकले शम्भुको कागजात र हस्ताक्षर दुरुपयोग गरी बैंकिङ ठगी गरेको कारण १२ लाख बढी नेपाली रुपैयाँ तिरेमात्रै उनी नेपाल आउने वातावरण बन्ने छ ।
आफ्नो घरको आर्थिक अवस्था एकदमै कमजोर रहेको र कमाउन वैदेशिक रोजगारीका लागि दुवई पुगेका श्रीमान पनि विचल्ली अवस्थामा रहेको भन्दै उनले आफूले सकेको सहयोग गरिदिन अपिल गरेकी छन् । साथै, शम्भु वैदेशिक रोजगारीमा गएको मोभिरा ओभरसिजबाट नेपाल फिर्ता ल्याउन कुनै प्रयास नै नभएको उनको भनाइ छ ।
सरकारी निकायहरुबाट पनि आफूले सहयोग नपाएको उनले बताइन् ।
