काठमाडौं । गैरआवासी नेपाली संघ (एनआरएनए) अन्तर्राष्ट्रिय समन्वय परिषद्ले बाढीपहिरोपीडितका लागि ५१ लाख रुपैयाँ सहयोग गरेको छ । सहयोग रकम प्रधानमन्त्री केपी शर्मा ओलीलाई बुधबार हस्तान्तरण गरिएको छ ।
प्रधानमन्त्री निवास, बालुवाटारमा प्रधानमन्त्री ओलीलाई संघका अध्यक्ष डा. बद्री केसीसहितको प्रतिनिधिमण्डलले उक्त रकम प्रधानमन्त्री दैवी प्रकोप राहत कोषमा जम्मा हुनेगरी हस्तान्तरण गरेको हो ।
अध्यक्ष केसीले हालैको बाढीपहिरो र डुुबानको खबरले आफूहरू दुःखित हुँदै कोषमा सहयोगका अतिरिक्त प्रभावित क्षेत्रमा एक करोड बराबरको राहत उपलब्ध गराउने कार्य भइरहेको जानकारी गराए ।
उनले ‘एनआरएनए नागरिकता’ प्राप्त भएपछि आर्थिक र सामाजिक काममा पनि त्यसको प्रयोगमा समस्या रहेको गुनासो गरे । दोहोरो नागरिकता समस्याको समाधानका लागि गम्भीर छलफल आवश्यक पर्ने बताए ।
प्रधानमन्त्री ओलीले संघलाई राजनीतिक आधारमा नभइ सबै गैरआवासीय नेपालीको साझा संस्थाका रूपमा अघि बढाउन सुझाव दिए ।
