काठमाडौँ । वैदेशिक रोजगारीमा हुँदा सामाजिक सञ्जालमा जोडिएर गोप्य तस्बिरहरू साटासाट भएकोमा पछि ती नै महिलाको चरित्र हत्या गर्ने गरी तस्बिरहरूको प्रसार गर्ने एक युवक पक्राउ परेका छन् ।
वैदेशिक रोजगारीबाट नेपाल फर्किदै गरेका सुर्खेतको गुर्भाकोट नगरपालिका-५ का २९ वर्षीय खगेन्द्र ऐरीलाई नेपाल प्रहरीको साइबर ब्युरोले विमानस्थलबाट बुधबार पक्राउ गरेको हो ।
साइबर ब्युरोका प्रवक्ता एवम् एसपी दिपकराज अवस्थीका अनुसार ऐरीले ती महिलासँग सामाजिक सञ्जालमा साथी बनेर कुराकानीका क्रममा म्यासेञ्जरमार्फत गोप्य तस्बिर साटासाट गरेको र पछि फेक आईडी बनाएर उक्त आईडीमार्फत आफन्त तथा साथीभाइलाई गोप्य तस्बिरहरू पठाएर चरित्र हत्या गरेको उजुरी परेको थियो ।
ती महिलाले ऐरीविरुद्ध २०७९ बैशाख २३ गते उजुरी दिएकी थिइन् । उनलाई पक्राउ गर्न नेपाल प्रहरीले इन्टरपोलमार्फत् रेड नोटिससमेत जारी गरेको थियो ।
