काठमाडौं । परराष्ट्र सचिव सेवा लम्सालसँग ओमनमा रहेका नेपालीहरूले अन्तरक्रिया कार्यक्रम सम्पन्न गरेका छन् ।
नेपाल र ओमानबिचको दुई पक्षीय संयन्त्रको पहिलो बैठकमा भाग लिन ओमान पुगेकी परराष्ट्र सचिव सेवा लम्सालसँग ओमनमा रहेका नेपालीहरूले अन्तरक्रिया गरेका हुन् ।
उनीहरुले अन्तरक्रिया कार्यक्रम गर्दै नेपाल–ओमान बिच सीधा हवाई उडानको व्यवस्था गर्न माग गरेका छन् । श्रमिकहरूले व्यक्तिगत मागपत्र प्रमाणीकरण, घरेलु महिला कामदार, नेपाली श्रमिकको उद्धार, क्षतिपूर्ति, शव व्यवस्थापन, पर्यटन, व्यापार, लगानी, ओमानमा नेपालीहरूको लागि रोजगार लगायतका विषयमा पनि सुझाव दिएका थिए ।
परराष्ट्र सचिव लम्सालले नेपाली श्रमिकहरूले राखेको जिज्ञासाको जवाफ दिँदै मध्यपूर्व एसियामा रहेका सम्पूर्ण नेपाली श्रमिकहरूको हित संरक्षणको लागि नेपाल सरकारले गरेको प्रयासबारे जानकारी दिइन् ।
समस्याको दीर्घकालीन समाधानको लागि नीतिगत सुधार सम्बन्धमा प्राप्त सुझावलाई समावेश गर्न आवश्यक पहल गर्ने प्रतिबद्धता जनाउँदै उनले ओमानमा रहेको नेपाली दूतावासले गरेको कामलाई प्रशंसा गरिन् ।
