काठमाडौं । वैदेशिक रोजगारीकालागि साउदी अरेबिया पुगेका १ सय ९० जना नेपालीले ज्यान गुमाएका छन् । नेपाली दूतावास रियादका अनुसार गत आर्थिक वर्ष २०८०/८१ मा वैदेशिक रोजगारीकालागि साउदी अरेबिया आएका १ सय ९० जना नेपालीले ज्यान गुमाएका हुन् । जसमा २४ जनाले आत्महत्या गरेका छन् ।
दूतावास रियादका अनुसार मृत्यु हुने अन्य विविध कारण अन्तर्गत सडक दुर्घटनामा २१ जना, प्राकृतिक घटनामा १ सय ८ जना ,कार्य घटनामा १८ जना, डुबानमा १ जना, हत्यामा २ जना र १६ जना नेपालीको मृत्यु अज्ञात रहेको उल्लेख गरिएको छ । भने आत्महत्या गरेका नेपालीहरू प्रायः जसो घरायसी तनाव र मानसिक चिन्तामा रहेको कारण खुलेको छ।
मृतक १ सय ९० जना मध्येबाट हालसम्म १ सय ८४ जनाको शव स्वदेश फिर्ता भइसकेको र अन्य बाँकी ६ जनाको प्रकियामा रहेको दूतावासले जनाएको छ। साउदीको धेरै प्रक्रिया पुरा गर्नुपर्ने र मृतकको इन्स्योरेन्स रकम उपलब्ध गराउने भएकाले शव नेपाल पठाउन लगभग १ महिना लाग्ने गरेको पाइन्छ ।
हाल साउदीमा वैधानिक तथा अवैधानिक रूपमा ४ लाख नेपालीहरू कार्यरत रहेको अनुमान छ । जसमध्ये मदिरा ओसारपसार, सेवन तथा विभिन्न कारणले ६ सय भन्दा बढि नेपाली जेलमा रहेको छन् ।
