काठमाडौँ । प्रहरी स्टाफ कलेजबारे अध्ययन गर्न गठन गरिएको समितिले अध्ययन प्रतिवेदन बुझाएको छ । प्रहरी हेडक्वार्टरले डीआईजी विश्व अधिकारीको नेतृत्वमा स्टाफ कलेजको कोर्स लगायतका अवधारणा परिमार्जन गर्नेबारे अध्ययन गर्न भदौ १७ मा समिति गठन गरेको थियो ।
केही दिनअघि समितिले सुझाव सहितको अध्ययन प्रतिवेदन आईजीपी दान बहादुर कार्कीलाई बुझाएको हो । समितिमा एसएसपी सोमेन्द्र सिंह राठौर, एसपी गजुसिद्धी बज्राचार्य र डीएसपी सुन्दर तिवारी सहित ७ जना सदस्य थिए ।
२०८२ वैशाख २१ मा प्रहरी प्रधान कार्यालयले प्रहरी स्टाफ कलेज अन्तर्गत मास्टर इन पुलिस साइन्स (एमपिएस) र प्रोफेशनल लिडरसिप कोर्स लागु गरेको थियो । अध्ययन समितिले स्टाफ कलेजलाई सामान्य परिमार्जन गर्न सुझाव दिएको छ । अध्ययन समितिले यस वर्ष अन्तिम पटक २०७० मा इन्स्पेक्टरमा भर्ना भएका अधिकृतहरूलाई मात्र स्टाफ कलेजमा सहभागी गराउन सुझाव दिएको छ । उनीहरू १५८ औँ समूहका अधिकृत हुन् । सो ब्याचका अधिकृतहरूले यसअघि दुई पटक स्टाफ कलेजको प्रवेश परीक्षा दिइसकेका छन् । प्रहरी स्टाफ कलेजबाट पहिलो ब्याचमा १७ जना डिएसपीहरूले कोर्स पुरा गरेका छन् । अहिले दोस्रो ब्याचमा १५ जना अधिकृतहरू स्टाफ कलेज अध्ययन गरिरहेका छन् । स्टाफ कलेज ४ वटा सेमेस्टरमा पुरा हुन्छ । १५८ औँ समूहका अधिकृतहरूका लागी यस वर्ष स्टाफ कलेजको प्रवेश परीक्षा अन्तिम हुनेछ ।
अध्ययन समितिको सुझावको आधारमा यस वर्ष २०७० मा भर्ना भएका अधिकृतहरूलाई मात्रै प्रवेश परीक्षामा सहभागी गराइने प्रहरी प्रवक्ता (डीआईजी) अबि नारायण काफ्लेले बताए । उनले भने, ‘यसपटक २०७० मा भर्ना भएकाहरूले मात्र प्रवेश परीक्षा दिन्छन् ।’
स्टाफ कलेजलाई कसरी प्रभावकारी बनाउने र प्रहरी ऐनमा नै व्यवस्थित गरेर त्यसलाई अघि बढाउनेबारे समितिले सुझाव दिएको डीआईजी काफ्लेले बताए । अध्ययन समितिले प्रतिवेदन बुझाएसँगै राष्ट्रिय प्रहरी प्रशिक्षण प्रतिष्ठानले प्रवेश परीक्षामा सहभागी हुने ६५ जना डिएसपीहरूको सूची प्रकाशन गरेको छ । उनीहरूसँग पुस पहिलो साता प्रवेश परीक्षा लिइने डीआईजी काफ्लेले बताए । उनले भने, ‘पुस पहिलो सातादेखि प्रवेश परीक्षा लिने गरी प्रक्रिया अघि बढेको छ ।’
पहिलो ब्याचको प्रवेश परीक्षामा १३१ जना र दोस्रोमा ८९ जनाले प्रतिस्पर्धा गरेका थिए । यसअघि प्रतिष्ठानले आगामी मंसिर १८ देखि तेस्रो ब्याचका लागी प्रवेश परीक्षा गर्ने कार्यतालिका सार्वजनिक गरेपनि विपद्को कारण देखाएर रद्द गरेको थियो । प्रवेश परीक्षामा चार वटा विषमा अनिवार्य ५० नम्बरको दरले २ सय अङ्क ल्याउनुपर्छ । त्यसबाहेक सिम्याटमा ४० अङ्क ल्याउनुपर्ने व्यवस्था छ । अध्ययन समितिले प्रवेश परीक्षा पास हुन आवश्यक अंकभार पनि परिमार्जन गरेको प्रहरी प्रधान कार्यालयका एक जना उच्च अधिकृतले बताए ।
प्रवेश परीक्षामा धेरै अधिकृतहरू अनुत्तीर्ण भएपछि स्टाफ कलेजबारे प्रहरीमा गुनासो बढेको थियो । आईजीपी दान बहादुर कार्कीलाई अधिकृतहरूले त्यसबारे गुनासो गरेका थिए । पाठ्यक्रम जटिल भएका कारण धेरै अधिकृतहरू प्रवेश परीक्षामा नै अनुत्तीर्ण भएको प्रहरी कर्मचारीहरू बताउँछन् ।
स्टाफ कलेजको निर्धारित कोटा अनुसार प्रत्येक वर्ष ३५ जना अधिकृतहरूको सहभागिता सुनिश्चित गर्न समितिले सुझाव दिएको छ । एउटा शैक्षिक सत्रमा ३५ जनालाई स्टाफ कलेजको कोर्स गराउने गरी सरकारले कार्यक्रम स्वीकृत गरेपनि पहिलो ब्याचमा १७ जना र दोस्रो ब्याचमा १५ जना मात्रै उत्तीर्ण भएपछि त्यसमा परिमार्जनको आवश्यकता देखिएको प्रहरी प्रवक्ता डीआईजी काफ्लेले बताए।
महाराजगञ्ज स्थित राष्ट्रिय प्रहरी प्रशिक्षण प्रतिष्ठानमा सञ्चालन भइरहेको स्टाफ कलेज १६ महिना सञ्चालन हुन्छ । १५८ औँ समूहका इन्स्पेक्टर र त्यसपछि भर्ना भएकाहरूले स्टाफ कलेज नगरे नेतृत्वमा पुग्न सक्दैनन् । स्टाफ कलेज नगरेकाहरु डीआईजीमा बढुवा हुन पाउँदैनन्।
