दुबईमा दुईतले बस हाँकिरहेकी छिन्, नेपाली साहसी महिला शान्तिकुमारी भण्डारी । ९ वर्ष पहिले सन् २०१५ मा भिजिट भिसा मार्फत यूएई पुगेकी उनको दृढ संकल्प, लचिलोपन, अटल महत्वाकांक्षाले मध्यपूर्वकै पहिलो डबल–डेकर (दुईतले) बस चलाउन सफल भईन् ।

भण्डारीले अहिले मध्यपूर्वकै पर्यटन क्षेत्रको पहिलो डबल–डेकर बस चलाउने नेपाली महिलाको उपाधि समेत पाएकी छिन् ।

दुबईका चिल्ला अनि फराकिलो सडक । सडकभरी सवारी साधन । त्यही व्यस्त लाइनमा दुबईमा आउने पर्यटक बोक्ने दुईतले बस । बसका दुई तलामा दुबई घुम्न आएका पर्यटकहरु भरिभराउ छन् । त्यही बस हाँक्छिन्, शान्ति । नेपाली महिला त्यो पनि विग बस चलाएको देखेर घुम्न दुबई आउने पर्यटकहरु हर्षित हुँदै शान्तिसँग सेल्फी खिच्न लाइन लाग्छन् । अहिले विभिन्न देशका सञ्चारमाध्यममा पनि शान्तिका संघर्ष र सफलताका विषयले प्राथमिकता पाइरहेको छ ।

बहिनीले पठाएको भिजिट भिसामा नेपालको ओखलढुंगाबाट युएईको यात्रा तय गरेकी उनले सुरुमा ब्युटिसियनका रूपमा न्यूनतम तलबमा सैलुनमा काम गरिन् । तर शान्तिले यूएईको लाइसेन्स पाउन सैलुनको कामले मात्र पुग्दैन थियो । उनले आफुले गर्दै गरेको काम छोडेर एक यातायात कम्पनीमा स्कूल बस सुपरभाइजरको काम गरिन्  ।

उनले सन् २०१७ मा सानो सवारीको लाइसेन्स प्राप्त गरिन् र अल गजल यातायातको ट्याक्सी चालकको रूपमा यूएईको राजधानी आबुधावीमा नयाँ रोजगारी थालिन् । ५ वर्षजति ट्याक्सी चलाएपछि उनको मनोबल सँगसगै महत्वाकांक्षा बढ्दै गयो र उनले  हेभी बस लाइसेन्स प्राप्त गर्न सोच बनाईन् । यो क्षेत्रमा महिलाहरू सहभागी नभएकाले शान्तिका आफन्तहरूले नै यसमा शंका व्यक्त गरे । धेरै संघर्षपछि उनी बसको फाइल खोल्न सफल भइन् । पछि अन्तर्वार्ता पनि दिइन् र पास पनि गरिन् । उनले सफलतापूर्वक हेभी बसको लाइसेन्स पहिलो ट्रायलमै प्राप्त गरिन् ।

‘मध्यपूर्वमा हेभी बस चालक अनुमति प्राप्त गर्ने प्रथम नेपाली महिला भएकोमा गर्व लाग्यो । धेरै नेपाली दिदीबहिनी तथा विदेशी महिला कामदार यसबाट प्रेरित हुने विश्वास छ ।’ शान्तिले भनिन् ।

त्यसपछि उनले यूएईको राजधानी अबुधावीको सिटी बस चलाउन आवेदन दिएकी थिइन् र अन्तर्वार्तामा पनि सफल भइन् । उनले ड्राइभिङ टेस्टमा समेत सफलता प्राप्त गरेकी थिइन् तर महिला बस चालकका लागि सिटी बसमा पोलिसी/नीति नभएका कारण राजधानी अबुधाबी बस चलाउन उनले दिएको आवेदन रिजेक्ट भयो । हालसम्म महिलालाई चालकका रूपमा राख्ने नगरेको भन्दै उनलाई लिन अस्वीकार गरियो ।

उनी भन्छिन्– ‘त्यसपछि मलाई धेरै तनाव भयो, तर पनि हार मानिनँ, अरू कम्पनी खोज्न थालें’, उनले पर्यटन क्षेत्रमा नयाँ रेकर्ड राख्ने लक्ष्यका साथ बिग बस टुर्समा आवेदन दिइन् । सुरुमा पर्यटन क्षेत्रले पनि महिला डबल डेकर बस चालक स्वीकार गरेन । त्यतिबेलासम्म मध्यपूर्वकै पर्यटन क्षेत्रमा कुनै महिला बस चालक थिएनन् ।

‘बिग बस कम्पनीमा पुगेर आफ्नो बायोडाटा गेटमै छाडेर फर्किएँ,’ भण्डारीले भनिन्– ‘भोलिपल्टै म्यासेज आयो, त्यसपछि बिग बस टुर्स मध्यपूर्वका क्षेत्रीय निर्देशक माइकल लीससँग भेट भयो । उनले प्रारम्भिक अवरोेधलाई मार्ग प्रशस्त गरेर मलाई इतिहास रच्ने अवसर प्रदान गरे ।’ उनको सहयोगमा मध्यपूर्वकै पर्यटन क्षेत्रको पहिलो महिला डबल डेकर बस चालकका रूपमा स्वीकृति प्राप्त भयो ।

यस क्षेत्रमा महिलाहरूले गर्दै नगरेको काम त्यो पनि सुरुमा ब्युटिसियनका रूपमा छिरेकी शान्तिले ट्याक्सी चालक हुँदै डबल डेकर हाँक्न थालेको अहिले १ वर्ष भयो । मध्यपुर्वको पर्यटकिय क्षेत्रमा पहिलो महिला डबल डेकर बस चालक भएको थाहा पाउँदा आँफैलाई गर्व लागेको शान्ति सुनाउँछिन् । शान्ति अहिले डबल–डेकर बस चालक बनेर चर्चा बटुल्न सफल भएकी छिन् । यति मात्रै नभइ शान्ति सामाजिकका अलवा खेल क्षेत्रमा पनि आफुलाई अभ्यस्त राख्दै आएकी छिन् । उनले यूएईमा समस्यामा परेका थुप्रै नेपालीहरुलाई आफ्नो तर्फबाट सहयोग गर्छिन् । हालै कोरियामा सम्पन्न मयोङ हान्मादाङ तेक्वान्दो प्रतियोगिता-२०२४ मा सहभागी भएकी थिईन् ।

मध्यपूर्वको पर्यटन क्षेत्रमा पहिलो महिला डबल डेकर बस चालकको रूपमा शान्तिका सफलता सबैको लागि प्रेरणाको स्रोत हो । दृढ सङ्कल्पका साथ सपनाहरू पछ्याउँदा कठिन बाधाहरू पार गर्न सकिन्छ, भन्ने गतिलो उदारहण हो शान्तिकुमारी भण्डारी । जुन जोस र  दृढ सङ्कल्पका प्रेरित हुँदा परिवर्तन सम्भव छ भन्ने सङ्केत गर्दछ ।