काठमाडौँ। बजारमा खाना पकाउने एलपी ग्याँसको कृत्रिम अभाव हुन नदिन जिल्ला प्रशासन कार्यालय स्याङ्जाले ग्याँस डिलर र सप्लायर्समाथि अनुगमन सुरु गरेको छ।उपभोक्ताबाट बजारमा एलपी ग्याँस सहज रूपमा नपाइएको गुनासो आएपछि सहायक प्रमुख जिल्ला अधिकारी प्रेम सुवेदीको नेतृत्वमा संयुक्त अनुगमन टोली परिचालन गरिएको हो।
टोलीले दुई दिनअघिदेखि जिल्लाका विभिन्न स्थानमा ग्यासको आपूर्ति, मौज्दात र वितरण अवस्थाबारे छड्के अनुगमन गरिरहेको छ।जिल्ला प्रशासन कार्यालय, जिल्ला प्रहरी कार्यालय, एकीकृत कार्यालय तथा सम्बन्धित निकायका प्रतिनिधि सम्मिलित टोलीले चापाकोट, वालिङ, भीरकोट र पुतलीबजार नगरपालिकामा रहेका ग्यास डिलर तथा सप्लायर्सको अनुगमन गरेको छ।
अनुगमनका क्रममा अधिकांश डिलरमा उद्योगबाट नियमित रूपमा एलपी ग्यास आपूर्ति भइरहेको पाइएको प्रशासनले जनाएको छ। यद्यपि ग्यासको वितरण प्रणालीलाई थप व्यवस्थित र पारदर्शी बनाउनुपर्ने आवश्यकता देखिएको अनुगमन टोलीको निष्कर्ष छ।
टोलीले डिलर तथा सप्लायर्ससँग रहेको ग्यासको मौज्दात, उद्योगबाट भएको आपूर्ति र उपभोक्तासम्म पुर्याइएको वितरणसम्बन्धी अभिलेखसमेत जाँच गरेको थियो । अनुगमनपछि सबै व्यवसायीलाई ग्यासको आयात, मौज्दात र वितरणको स्पष्ट विवरण राख्न निर्देशन दिइएको छ।
सहायक प्रमुख जिल्ला अधिकारी सुवेदीले बजारमा ग्यासको कृत्रिम अभाव सिर्जना गर्ने कुनै पनि गतिविधि सह्य नहुने बताए। उद्योगबाट नियमित रूपमा आएको ग्यास अनावश्यक रूपमा थुपार्ने, वितरणमा विभेद गर्ने वा आपूर्ति हुँदाहुँदै अभाव देखाउने काम भेटिए प्रचलित कानुनअनुसार कारबाही गरिने उनले चेतावनी दिए।
उनले उपभोक्ताको हित संरक्षण प्रशासनको प्रमुख जिम्मेवारी रहेको उल्लेख गर्दै बजार अनुगमनलाई निरन्तरता दिइने बताए। ग्यास वितरणमा समस्या, अनियमितता वा कृत्रिम अभाव सिर्जना गर्ने प्रयास देखिए तत्काल जिल्ला प्रशासन कार्यालयलाई जानकारी गराउन उनले उपभोक्तासँग आग्रह गरे।
