काठमाडौँ । सार्वजनिक लेखा समितिले गत वर्ष भदौ २३ र २४ गते भएको जेनजी आन्दोलनका क्रममा देशका विभिन्न स्थानमा जलेका सरकारी स्रेस्ताको अवस्थाबारे अध्ययन तथा छलफल गर्ने भएको छ।
समितिले उक्त विषयमा छलफलका लागि आगामी मंगलबार बिहान ११ बजे बैठक बोलाएको छ । सिंहदरबारस्थित समितिको बैठक कक्षमा बस्ने बैठकमा आन्दोलनका क्रममा क्षति पुगेका स्रेस्ता तथा त्यसबाट लेखापरीक्षणमा परेको प्रभावबारे विषय केन्द्रित गरिने जनाइएको छ।
बैठकमा अर्थमन्त्री, अर्थ सचिव, मुख्य सचिव तथा महालेखा परीक्षकलाई आमन्त्रण गरिएको छ । आन्दोलनका क्रममा सरकारी कागजात तथा स्रेस्ता जलेका कारण कतिपय अभिलेखको लेखापरीक्षण हुन नसकेको विषयलाई समितिले छलफलको आधार बनाएको हो।
देशभर आन्दोलनका क्रममा क्षति भएका स्रेस्ताको अवस्था, अभिलेख संरक्षण तथा लेखापरीक्षणमा उत्पन्न भएको व्यावहारिक समस्याबारे सम्बन्धित पदाधिकारीसँग जानकारी लिने समितिको तयारी छ।
