काठमाडौँ। भारतका तीन राज्य बिहार, मध्य प्रदेश र गुजरातका तीन विधानसभा सिटमा जुलाई ३० मा भएको उपचुनावको मतगणना भइरहेको छ।बिहारको बाँकीपुरमा जन सुराजका संस्थापक प्रशान्त किशोरले लगातार अग्रता बनाइरहेका छन्।
उनले अहिलेसम्म १३ हजार ५ सय मत प्राप्त गरेका छन्। भाजपाका नीरज कुमारले ९ हजार ६ सय ८९ मत पाएका छन् र उनी ३ हजार ८ सय ११ मतले पछाडि छन्। उता आरजेडीकी रेखा कुमारी २ हजार ५ सय ९९ मतका साथ तेस्रो स्थानमा छिन्।
बाँकीपुर सिट भाजपा अध्यक्ष नितिन नवीनको परम्परागत सिट मानिन्छ। उनी यो सिटबाट लगातार ५ पटक विधायक भइसकेका छन्। उनी राज्यसभामा गएपछि यहाँ उपचुनाव भएको हो
मध्य प्रदेशको दतियामा भाजपा र काङ्ग्रेसबीच कडा प्रतिस्पर्धा भइरहेको छ। सुरुआती तीन राउन्डमा भाजपा उम्मेदवार आशुतोष तिवारी अगाडि थिए। तर चौथो राउन्डमा काङ्ग्रेस उम्मेदवार घनश्याम सिंहले अग्रता लिएका छन्।
गुजरातको मञ्जुलपुरमा भने भाजपा उम्मेदवार सतीश पटेलको जित लगभग पक्का भएको छ। उनी १३ हजार ५ सय ९१ मतले अगाडि छन्।
