काठमाडौं । सरकारले चालु आर्थिक वर्ष २०८३/८४ लाई नेपालको दूरसञ्चार क्षेत्रको 'रूपान्तरणको वर्ष' घोषणा गरेको छ । यस क्षेत्रमा अभूतपूर्व सुधारका योजनाहरू अघि सार्दै सूचना तथा सञ्चार मन्त्री विक्रम तिमिल्सिनाले यस्तो घोषणा गरेका हुन् ।
मन्त्री तिमिल्सिनाले सामाजिक सञ्जाल फेसबुक मार्फत चालु आर्थिक वर्षका लागि मन्त्रालयका प्रमुख लक्ष्यहरू सार्वजनिक गरेका छन् । जसको आधारमा यस वर्ष दूरसञ्चार क्षेत्रलाई नयाँ उचाइमा पुर्याइने उनको दाबी छ ।
मन्त्री तिमिल्सिनाले यस वर्ष नागरिकले प्रत्यक्ष रूपमा अनुभूति गर्ने गरी गुणस्तरीय र भरपर्दो सेवा तथा आधुनिक दूरसञ्चार पूर्वाधारको विकासमा जोड दिइने बताएका छन् । यस अभियानअन्तर्गत देशव्यापी रूपमा उच्च गुणस्तरको फोरजी सेवा सुनिश्चित गर्ने र नेपालमा लामो समयदेखि पर्खाइमा रहेको व्यावसायिक फाइभजी सेवाको औपचारिक सुरुआत गर्ने मन्त्रालयको मुख्य लक्ष्य रहेको छ ।
प्रत्येक नागरिकलाई भरपर्दो दूरसञ्चार र इन्टरनेट पहुँच उपलब्ध गराउने उद्देश्यसहित मन्त्रालयले ग्राहकको अनुभव र सेवाको गुणस्तरमा मापनयोग्य सुधार ल्याउने प्रतिबद्धता समेत जनाएको छ ।
यसका साथै, सरकारी स्वामित्वको दूरसञ्चार सेवा प्रदायक कम्पनी नेपाल टेलिकमको समग्र रूपान्तरण गर्दै यसको प्रतिस्पर्धात्मक क्षमता अभिवृद्धि गर्ने महत्त्वपूर्ण योजना पनि मन्त्री तिमिल्सिनाले सार्वजनिक गरेका छन् । दूरसञ्चार क्षेत्रको प्रभावकारी नियमन र गुणस्तर अनुगमनलाई थप सुदृढ गर्ने तथा सार्वजनिक सञ्चार संस्थाहरूलाई सक्षम, व्यावसायिक र विश्वसनीय बनाउने मन्त्रालयको कार्ययोजनामा उल्लेख छ ।
परिणाममुखी कार्यसम्पादनमार्फत उत्तरदायी र सुशासित दूरसञ्चार क्षेत्र निर्माण गर्ने प्रतिबद्धतासहित मन्त्री तिमिल्सिनाले सार्वजनिक गरेको यस योजनाले नेपालको समग्र सूचना प्रविधि, दूरसञ्चार र इन्टरनेट सेवाको क्षेत्रमा सकारात्मक परिवर्तन ल्याउने अपेक्षा गरिएको छ । मन्त्रालयले 'अभूतपूर्व सुधारको वर्ष' का रूपमा अघि बढाएको यो कदमले डिजिटल नेपाल निर्माणको महाअभियानलाई समेत सार्थक बनाउन मद्दत पुग्ने सहयोग पुर्याउनेछ ।
