काठमाडौँ । नेपालमा हाइड्रोजनमा आधारित सवारी साधन सञ्चालनका लागि सरकारले आवश्यक तयारी थालेको छ।
पूर्वाधार विकास मन्त्रालयले हाइड्रोजन गाडीको सुरक्षित, दिगो तथा प्रभावकारी विकास र सञ्चालनका लागि आवश्यक नीति, कानुन र मापदण्ड तय गर्न सरोकारवालाहरूसँग सुझाव मागेको हो।
मन्त्रालयले एक सूचना जारी गर्दै विश्वविद्यालय, अनुसन्धान संस्था, व्यावसायिक निकाय, उद्योग, विकास साझेदार, अन्तर्राष्ट्रिय संस्था तथा सम्बद्ध पक्षलाई लिखित सुझाव दिन आह्वान गरेको छ । सरोकारवालाले आफ्नो अध्ययन, अनुसन्धान र अभ्यासका आधारमा आगामी साउन २० गतेसम्म मन्त्रालयको इमेल [email protected] वा [email protected] मार्फत सुझाव पठाउन सक्नेछन्।
प्राप्त सुझावलाई मन्त्रालयले नीतिगत, कानुनी तथा प्राविधिक आधार तयार गर्न उपयोग गर्नेछ । विशेषगरी अन्तर्राष्ट्रिय उत्कृष्ट अभ्यास, नियामक व्यवस्था, सुरक्षा मापदण्ड र जनशक्ति विकासका विषयमा केन्द्रित रहेर सुझाव दिन मन्त्रालयले अनुरोध गरेको छ।
