काठमाडौँ । कास्कीको पोखरा महानगरपालिका २६ कालिकाचोकमा सेतो ढुङ्गाजस्तो टल्किने पदार्थलाई बहुमूल्य वस्तु भन्दै सर्वसाधारणलाई प्रलोभनमा पारेर ठगी गर्ने कार्यमा संलग्न छ जनालाई प्रहरीले नियन्त्रणमा लिएको छ। विशेष सूचनाका आधारमा खटिएको प्रहरी टोलीले उनीहरूलाई पक्राउ गरेको हो।
पक्राउ परेका व्यक्तिहरू भाडामा बस्दै आएको डेरा तथा उनीहरूको शरीर खानतलासी गर्दा प्रहरीले विभिन्न सामग्री बरामद गरेको छ। बरामद गरिएका सामानहरूमा सेतो टल्किने क्रिस्टलजस्तो लाम्चो देखिने वस्तु एक थान, काठको फोल्डिङ बट्टा एक थान, करिब छ फिट पाँच इन्च लम्बाइको केबलसहितको चार्जर एक थान र छ थान मोबाइल फोन रहेका छन्।
पक्राउ पर्नेहरूमा पर्वतको फलेवास नगरपालिका ५ घर भएका ३५ वर्षीय राजन विक, सोही ठाउँकी २७ वर्षीया रोशनी विक र ६९ वर्षीया बाटुली भन्ने खगिसरा कामी रहेका छन्। यसैगरी म्याग्दीको मालिका गाउँपालिका ४ घर भई हाल पोखरा २६ बस्ने ५१ वर्षीय दिलबहादुर बुढा मगर, म्याग्दीकै रघुगङ्गा गाउँपालिका ५ घर भई हाल पोखरा २७ अर्चले बस्ने २९ वर्षीय दीपक गोतामे र कास्कीको पोखरा २१ निर्मलपोखरी घर भई हाल पोखरा ५ मालेपाटन बस्ने ४५ वर्षीय प्रेमचन्द्र विश्वकर्मालाई पनि प्रहरीले नियन्त्रणमा लिएको छ।
पक्राउ परेका सबै जनामाथि हिरासतमा राखेर घटनाको सम्बन्धमा आवश्यक अनुसन्धान भइरहेको प्रहरीले जनाएको छ।
