काठमाडौँ । सामाजिक सञ्जालमा स्वास्थ्यमन्त्री निशा मेहताविरुद्ध टिप्पणी गरेको आरोपमा प्रहरीले धनुषाका एक जना स्वास्थ्यकर्मीलाई सोधपुछ गरेको छ।
हेल्थ असिस्टेन्ट नवेश अधिकारीलाई धनुषा प्रहरीले नियन्त्रणमा लिएर सोधपुछ गरेपछि रिहा गरेको हो।
धनुषा स्थित एक निजी स्वास्थ्य संस्थामा काम गर्दै आएका अधिकारीले स्वास्थ्यकर्मी सेवा सुविधा बढाउन माग गर्दै मन्त्रीको राजीनामा माग्दै सामाजिक सञ्जालमा पोस्ट गरेका थिए । अधिकारीले शनिवार स्वास्थ्यमन्त्री मेहताको तस्बिर रातो मसिले क्रस गर्दै ‘माफिया मन्त्री’ उल्लेख गरेर पोस्ट गरेका थिए ।
स्वास्थ्यकर्मी अधिकारीलाई सामान्य सोधपुछ गरेर रिहा गरिएको धनुषाका एसपी रुपेश खड्काले रातोपाटीलाई बताए। उनले भने, ‘हामीले बोलाएका थियौँ, उहाँलाई सामान्य सोधपुछ गरेर रिहा गरिएको छ ।’
आफू कार्यरत संस्थामा पनि अधिकारीले तलब र सुविधा वृद्धि गर्नुपर्ने माग उठाउँदै आएका थिए।
