काठमाडौँ । मध्यपूर्वमा युद्धविराम भएसँगै श्रीलंकाले मंगलबार इन्धनको मूल्यमा छ प्रतिशतसम्मको कटौती गरेको छ।
श्रीलंकाको सरकारी पेट्रोलियम कर्पोरेसनका अनुसार पछिल्लो निर्णयसँगै डिजेलको मूल्य प्रतिलिटर २५ रुपैयाँले घटाएर ३८२ रुपैयाँ र पेट्रोलको मूल्य प्रतिलिटर २० रुपैयाँले घटाएर ४१४ रुपैयाँ कायम गरिएको छ।
अमेरिका र इरानबीच आफ्नो द्वन्द्व अन्त्य गर्न वार्ता गर्ने सहमति भएसँगै अन्तर्राष्ट्रिय बजारमा ऊर्जाको मूल्यमा तीव्र गिरावट आएको थियो, जसको प्रत्यक्ष सकारात्मक प्रभावस्वरूप श्रीलंकाले पनि स्थानीय बजारमा इन्धनको मूल्य घटाएको हो ।
यसअघि गत फेब्रुअरी २८ मा अमेरिका र इजरायलले इरानमाथि सैन्य आक्रमण गरेपछि श्रीलंकामा इन्धनको मूल्यमा व्यापक वृद्धि भएको थियो। त्यसबेला अन्तर्राष्ट्रिय संकटलाई देखाउँदै पेट्रोल र डिजेलको मूल्य करिब ५० प्रतिशतसम्म बढाइएको थियो ।
द्वन्द्वको समयमा विश्व बजारमा तेलको मूल्य उच्च हुँदा आयात लागत निकै बढेपछि त्यसलाई सन्तुलनमा राख्न श्रीलङ्काली अधिकारीहरूले बिजुलीको शुल्कमा समेत एक तिहाइले वृद्धि गरेका थिए।
श्रीलङ्काले आफ्नो देशका लागि आवश्यक पर्ने सम्पूर्ण कच्चा तेल विदेशबाटै खरिद गर्ने गर्दछ भने बिजुली उत्पादनका लागि समेत ऊ पूर्ण रूपमा आयातित कोइलामा निर्भर रहने गर्दछ।
यही बाध्यताका कारण मध्यपूर्वमा जारी लामो द्वन्द्वले श्रीलंकाको पहिलेदेखि नै कमजोर रहेको आर्थिक अवस्थालाई थप संकटमा पार्न सक्ने चेतावनी अर्थविद् तथा अधिकारीहरूले दिँदै आएका थिए ।
तर, पछिल्लो समय मध्यपूर्वमा शान्तिको वातावरण बन्दै गएपछि अन्तर्राष्ट्रिय ऊर्जा बजार सुध्रिएकाले टापु राष्ट्र श्रीलंकाको अर्थतन्त्र र उपभोक्ता दुवैले ठूलो राहत पाएका छन् ।
