काठमाडौँ । कानुन, न्याय तथा संसदीय मामिला मन्त्री सोबिता गौतमले संसदीय अभ्यासलाई उपलब्धिमूलक बनाउनका लागि जनताका मुद्दालाई नै केन्द्रमा राखेर बहस गर्न सांसदहरूलाई आग्रह गरेकी छन्।
संसद्को ६८ औँ दिवसका अवसरमा सिंहदरबारमा मंगलबार आयोजित कार्यक्रममा मन्त्री गौतमले संसद्को गरिमा र औचित्य स्थापित गर्नका लागि प्रक्रियागत अल्झनभन्दा पनि जनसरोकारका विषयले प्राथमिकता पाउनुपर्ने बताइन् ।
मन्त्री गौतमले प्रक्रियाका विषयहरू कार्यव्यवस्था परामर्श समिति वा अनौपचारिक बैठकहरूबाट सुल्झाउन सकिने बताउँदै संसद्को बैठकमा बस्दा केवल जनताका समस्यामा मात्रै छलफल गर्नुपर्ने बताइन् ।
‘जनताले तिरेको करबाट राज्यकोष र हामी सञ्चालन भइरहेका छौँ। त्यसैले संसद्मा हामीले पाउने एक मिनेटको समय पनि शिक्षा, स्वास्थ्य र जनताका तमाम समस्या समाधानका उपायहरू खोज्नमै केन्द्रित हुनुपर्छ,’ मन्त्री गौतमले भनिन् ।
उनले सरकारलाई जबाफदेही बनाउन र जनहितका विषयमा व्यापक बहस गर्न सके मात्र संसद्प्रति जनताको दृष्टिकोण सकारात्मक हुने दाबी गरिन् ।
संसद्को गुणस्तर पहिलाको तुलनामा खस्कँदै गएको भन्ने जनगुनासोप्रति मन्त्री गौतमले गम्भीर चिन्ता व्यक्त गरिन् । ‘संसद्को गुणस्तर किन खस्किँदै छ भन्ने प्रश्नमा हामी आफैँले मनन गर्नुपर्ने बेला आएको छ,’ गौतमले भनिन् ।
संसद्लाई मर्यादित बनाउन सांसदहरूको आफ्नै व्यवहार मुख्य कडी हुने उनको भनाइ थियो ।
