काठमाडौँ । सरकारले भिजिट भिसामार्फत खाडी मुलुक जानेहरु माथी कडाइ गरेको छ ।पछिल्लो समय भिजिट भिसामा वैदेशिक रोजगारीका लागि खाडी मुलुकमार्फत अन्य विभिन्न देशमा जाने क्रम बढेपछि सरकारले कडाइ गरेको हो ।
विशेष गरी घरेलु कामदारका लागि खाडी मुलुकसहित प्रतिबन्धित देशमा जाने महिलाको सङ्ख्या बढेपछि त्रिभुवन अन्तर्राष्ट्रिय विमानस्थलको अध्यागमन कार्यालयमै कडाइ गरिएको अध्यागमन कार्यालयका प्रमुख सुरेश पन्थीले बताए ।
संयुक्त अरब इमिरेट्स (यूएई), बहराइन, साउदी अरब,कुबेत, कतार, ओमनमा भिजिट भिसामा भ्रमण गर्दा कार्यविधिमा उल्लेख भएकाले मापदण्डलाई कतिपयले दुरुपयोग गर्न थालेपछि कडाइ गरिएको अध्यागमन कार्यालयका प्रमुख पन्थीले बताए ।
पन्थीका अनुसार पछिल्लो एक हप्तामा भिजिट भिसामार्फत घरेलु कामदारका लागि विदेश जान लागेका पाँच सयभन्दा धेरै महिलासहितका पुरुषलाई विमानस्थलबाटै फर्काइएको जानकारी दिए ।
उनले भने, भिजिट भिसा देखाएर कामदारका लागि जान खोज्नेलाई हामीले फिर्ता गर्ने गरेका छौँ, आवश्यक कागजत बोकेर भिजिट भिसामा जान लागेकालाई भने रोकिएको छैन ।
