काठमाडौं । सामाखुशीस्थित गुरुङ म्यानेजमेन्ट म्यानपावरबाट बुल्गेरिया पठाइदिने भन्दै कैलालीका अस्मिता बस्नेत र अंकिता चौधारीसँग साढे २९ लाख रुपैयाँ लिएको पाइएको छ ।
बुल्गेरिया पठाइदिने भनी बिचौलिया राजकुमार भण्डारीले गुरुङ म्यानेजमेन्ट सामाखुशी लगेका थिए । अन्ततः अस्मिता र अंकिताको रकममात्र ठगिएन, भारतमा लगेर झण्डै एक महिना बन्धक जीवन बिताउनुपर्यो ।
उक्त म्यानपावर वैदेशिक रोजगार व्यवसायी संघका हालै निर्वाचित अध्यक्ष भुवनसिंह गुरुङको हो ।
गुरुङको एजेण्ट राजकुमार भण्डारीले अध्यक्ष गुरुङकै म्यानपावरमा आर्थिक कारोवार गरेको समेत पीडितले उजुरीमा उल्लेख गरेका छन् । गुरुङको म्यानपावरमा गएर कुराकानी गर्दा पैसा दिने आश्वासन मात्र दिएको पीडित बस्नेतले जानकारी दिइन् ।
भण्डारीले अस्मिता बस्नेतको १४ लाख र अंकिता चौधरीको १५ लाख ५० हजार लिएको उजुरी काठमाडौं उपत्यका अपराध अनुसन्धान कार्यालय टेकुमा परेको छ । उनीहरु गुरुङको म्यानपावरबाट भारत हुँदै बुल्गेरिया पठाउने भनेर भारतको दिल्ली हुँदै पन्जावमा राखेको, त्यसपछि फेरी दिल्ली ल्याएर अलपत्र परेको भन्दै पीडितले उजुरी कार्यालयमा दिएका छन् ।
भण्डारी भने गुरुङको एजेन्ट भएको पीडितले बताईन् ।
