काठमाडौं । रुसको मस्कोस्थित नेपाली दूतावासले रुसी सेनामा भर्ती भई रुस–युक्रेन युद्धमा मारिएकामध्ये तीन नेपालीको अस्तु नेपाल पठाउने भएको छ ।
रुसी सेनामा भर्ती भई युक्रेनसँगको युद्धमा मृत्यु भएका परिवारको सहमतिमा रुसमै अन्त्येष्टि गरिएका तीनजनाको अस्तु नेपाल ल्याउन लागिएको हो । जसमा स्याङ्जाका प्रितम कार्की, कास्कीका देवान राई र स्याङ्जाका हरि अर्याल छन् ।
रुस–युक्रेन युद्धमा हालसम्म ४० नेपालीको मृत्यु भइसकेको छ । तीमध्ये परिवारको सहमति र दूतावासको पहलमा तीनजनाको रुसमै अन्त्येष्टि गरिएको थियो ।
परराष्ट्र मन्त्रालय स्रोतका अनुसार तीनजनाको अस्तु अहिले मस्कोस्थित नेपाली दूतावासमा राखिएको छ । दूतावासले छिट्टै प्रक्रिया पूरा गरेर तीनजनाको अस्तु काठमाडौं पठाउन लागेको बताइएको छ ।
क्षतिपूर्तिको लागि ६ जनाको कागजात पठाइयो
यस्तै, रुसी सेनामा भर्ती भई युक्रेनसँगको युद्धमा मारिएकामध्ये ६ जनालाई क्षतिपूर्ति रकम उपलब्ध गराउने प्रक्रिया अघि बढेको छ । मृतकको क्षतिपूर्तिका लागि सम्पूर्ण कानुनी प्रक्रिया पूरा गरी परराष्ट्र मन्त्रालयको कन्सुलर सेवा विभागमार्फत कागजात रुस पठाइएको छ ।
मृत्यु भएकामध्ये पहिलो चरणमा स्याङ्जाका प्रितम कार्की, कास्कीका देवान राई, सन्दीप थपलिया, रुपक कार्की (कपिलवस्तु), गंगाराम मोक्तान (इलाम) र राजकुमार रोका (दोलखा) को परिवारलाई रुसले क्षतिपूर्ति रकम उपलब्ध गराउने छ ।
