काठमाडौं । आगामी वैशाख २८ गते सम्पन्न हुने नेपाल लोकतान्त्रिक वैदेशिक रोजगार व्यवसायी एशोसिएसनको साधारण सभा र नयाँ नेतृत्व चयनको तयारीको निम्ति तीव्र रुपमा काम अघि बढेको छ । नयाँ नेतृत्वमा को आउने भन्ने विषयमा दुइवटा प्यानल खडा हुने पक्का भएपनि त्यसको अन्तिम टुंगो भने प्यानलवालाहरूले लगाउन सकेका छैनन् ।

यसको निम्ति नयाँ नेतृत्वको निर्वाचनका लागि अध्यक्ष तथा पदाधिकारीका आकांक्षी व्यवसायी आन्तरिक छलफलमा लागिरहेका छन् । साधारण सभा सम्पन्न गर्ने र नयाँ नेतृत्व चयनको निम्ति अब मात्र डेढहप्ता मात्र समय बाँकी रहेको बेला प्रतिस्पर्धीहरूबिच अस्वस्थ गतिविधिहरूसमेत छिटपुट रुपमा देखिन थालेका छन् । प्रतिस्पर्धीहरूले अरुभन्दा आफूलाई जायज उम्मेदवारको रुपमा प्रस्तुत गर्नको निम्ति आफूभन्दा प्रतिस्पर्धी उम्मेदवारलाई कमजोर रुपमा प्रस्तुत गर्दै आफ्नो पल्ला भारी गर्ने प्रयास पनि गरिरहेका छन् ।

अस्वस्थ प्रतिस्पर्धाको क्रममा कतिपय ब्यबसायीहरू आफूले नजिते पनि हराउने अभियानमा समेत सक्रिय हुनथालेका छन् । २३ सदस्यीय कार्यसमिति रहने व्यवस्था भएको लोकतान्त्रिक व्यवसायीको कार्यसमितिमा अध्यक्षसहित वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्ष र सदस्यहरूसहित २३ सदस्यीय रहने व्यवस्था छ । साधारण सभापछिको निर्वाचनले १९ जनाको मात्रै निर्वाचन गर्नेछ भने ४ जना कार्यसमिति सदस्य निर्वाचित अध्यक्षले मनोनयन गर्ने व्यवस्था रहेको छ । निर्वाचित कार्यसमितिको कार्यकाल दुई वर्षको हुने व्यवस्था रहेको छ । अध्यक्षको लागि अहिलेसम्म ४ जना आकांक्षी देखिएका छन् । महासचिवलगायतका पदाधिकारीका लागि तीन जना व्यवसायीले आकांक्षा राखेका छन् । जुनकुरोको टुंगो अध्यक्षको निर्णय भएपछिमात्रै लाग्ने थाहा भएको छ ।

अहिलेलाई भने नेतृत्व लिनको निम्ति भित्र भित्रै रस्साकस्सी चलिरहेको छ । गत निर्वाचनमा तत्कालीन उपाध्यक्ष तारानाथ अर्याल, पूर्वउपाध्यक्ष ऋषि शर्मा, हालका अध्यक्ष कुमुद खनालबीच प्रतिस्पर्धा भएको थियो । हाल एशोसिएसनको सदस्यभन्दा पदाधिकारीमा व्यवसायीहरूको आकर्षण बढी देखिएको छ । नयाँ कार्यसमिति र नेतृत्व आउँदैगर्दा एशोसिएसनले लेवी अर्थात सदस्यता शुल्क बुझाएर निर्वाचनका लागि योग्य बन्न आफ्ना सदस्यहरूलाई आग्रह गरेको छ ।

एशोसिएसनले निर्वाचनसहतिको १२औं साधारण सभामा भाग लिन एशोसिएसनसँग आवद्ध हुन कम्पनीको लेटरहेडमा निवेदन, इजाजत पत्रको प्रतिलिपि, शेयर लगतको प्रमाणित प्रतिलिपि, नागरिकताको प्रतिलिपि, अटो साइजको २ प्रति फोटोसहित तोकिएको लेवी समयमै बुझाउन आग्रह गरेको छ । समयमा लेवी बुझाएर सदस्यता नवीकरण नगरे संघले साधारण सभा र निर्वाचनमा भाग लिन नदिने भएको छ ।