काठमाडौँ । जर्मनीले युक्रेनका लागि ५० हजार आक्रमणकारी ड्रोन खरिद गर्न करिब ९ करोड युरो बराबरको आर्थिक सहयोग उपलब्ध गराएको छ। यो युक्रेनका लागि कुनै पनि पश्चिमी मुलुकले गरेको सबैभन्दा ठूलो ड्रोन खरिदमध्ये एक भएको बताइएको छ।
यस विषयमा जानकारी राख्ने एक स्रोतका अनुसार रुसविरुद्ध चार वर्षभन्दा लामो समयदेखि जारी युद्धमा युक्रेनले मानवरहित हवाई साधन (ड्रोन)को व्यापक प्रयोग गर्दै आएको छ। हाल युक्रेनले वार्षिक रूपमा लाखौँ ड्रोन उत्पादन गरिरहेको छ भने दैनिक हजारौँ ड्रोन आक्रमण सञ्चालन गरिरहेको छ।
खरिद गरिएका ड्रोनहरू ‘श्राइक’ फर्स्ट पर्सन भ्यु (एफपीभी) मोडेलका हुन्। ती युक्रेनको प्रमुख ड्रोन निर्माता स्काइफलले उत्पादन गरेको हो। यी ड्रोनमा अमेरिकी रक्षा प्रविधि कम्पनी अटेरियनले विकास गरेको विशेष सफ्टवेयर जडान गरिएको छ, जसले उडानको अन्तिम चरणमा चलायमान लक्ष्यलाई स्वतः पहिचान गरी आक्रमण गर्न सक्षम बनाउँछ।
अटेरियनका प्रमुख कार्यकारी अधिकृत लोरेन्ज मेयरले उक्त सम्झौताको आकार पुष्टि गर्दै यसको लागत करिब ९ करोड युरो रहेको र यो रकम एक युरोपेली मुलुकले उपलब्ध गराएको बताएका छन्। उनका अनुसार केही ड्रोन युक्रेनी सरकारलाई हस्तान्तरण गरिसकिएको छ भने बाँकी यसै वर्षभित्र पठाइनेछ।
स्काइफलले पनि यो खरिदमा जर्मनीको संलग्नता पुष्टि गरेको छ। तर, खरिद सम्झौताका विस्तृत विवरण सार्वजनिक गर्न नसकिने जनाएको छ।
जर्मनीको रक्षा मन्त्रालयले भने सञ्चालन सुरक्षाको कारण देखाउँदै यस विषयमा टिप्पणी गर्न अस्वीकार गरेको छ। युक्रेनको रक्षा मन्त्रालयले पनि यसबारे कुनै प्रतिक्रिया दिएको छैन।
